عني ..

عنى انا ..
مأساوى جدا منطوى
عايش ف ضهر الامنيات
ومخاصم الشمس / الحقيقة ..
اخر مجازفة اخدتها 
كانت اعترافى ب سر
حط سكين المغامرة فوق رقابهم كلهم . 

…

ب اعترافى ..
 النهاردة ادينى قاعد جنب منى حاجات كتيرة
وبرضه لسة
تايهة فيهم !
مليون قصيدة كأنهم تفصيل عليكى
وانتى غايبة !
مش لاقيكى
فا كان طبيعى
لما اشوفك / ألمحك
طالعالى منهم
احضُنِك .

عنى انا ..
لسة من اكتر مخاوفى
الروتين
عندى فوبيا الابتكار مع انى
مبدع.
قلبى شاكك
_على رأى ابويا_
"انت ممكن تبقى حاجة بس
ركز .”
واما شوفتك
كل حاجة فجأة وضحت
.. 
عنى انا
*مين اللى يقدر يمد ايده ف جهلنا ؟
ينزع عروق النطاعة !…*
_مشكلتى ف الناس اللى ماتت
مشكلتى ف الروح الل طلعت
غضبان لان الشمس نامت
والجريمة علينا ثبتت
.
عنى انا
"ملعونة ديك التوهة
لما تبقى ف عز حاجتك للبراح “
_ ايد بتاخد خطوتك ل طريق جديد
و واحدة تانية مثبتة عليك التابوت
تيجى شيزوفرينيا صعبة
مابين حقيقة بتولدك
وحقيقة تانية مجهزالك
أحلي موت 

عنى انا
وان صعب جدا تعرفينى
ابقى اسألى عن السكك !
او شوفى عضمى .. ف اى ركن..