مش عارف ..

مبضون, بطّلت سجاير من أسبوع ومالقتش رفيق غيرها فرجعت أشرب تاني, مش مهتم بوجع صدري اللي عمال يزيد كل يوم, لا روحت كشفت ولا هروح عشان كسم الدكاترة, مش عايز أكتب حاجة علي الفايسبوك عشان كسم اللي عندي هناك, وبقيت أحس إن المكان إنتهكت مساحته الشخصية زيادة عن اللزوم فاجيت هنا, مجرد تفريغ كلام, مش عايز أتكلم مع حد أو أصلاً ماعنديش حد أتكلم معاه, أوقات بحس إني ماعنديش مانع أحب من غير ما اتحب ف الآخر بحس إن عندي صبر كبير أقنع حد بحبي, 

أي إنسان أبله لما حد يديله حب يعرف يقنعه بده, أنا دارس نفسيات كتير وأغلب اللي أعرفهم أقدر أقنعهم إني شخص يتحب لو إهتميت بده, الفكرة إني مش مهتم, عندي قدرة إني أكتب كلام يلم ناس ومابعملش كده, مابنشرش أي حاجة من اللي بكتبها رغم إن دي تقريباً أصعب فترة ف حياتي, وأكتر فترة أنا بكتب فيها, بحس إنه مالوش لازمة, ولا ليها لازمة الشكوي ولا الكتابة ولا أي حاجة خالص, الحياة مش ناقصة إدعاء, كفاية عليها إنها بتدعي إنها حياة, ديماً بحس إني غريب,عمري ماعرفت أنا بعمل ليه كده وليه مابعملش, مالومتش حد علي حاجة إلا وعملتها بعد فترة, صحيح بضحك وسطهم, بس مابعرفش أهزر هزارهم

أحاسيس بتلعب بيا وخلاص وديماً بمشي وراها, بحاول أطلق مشاعري وغرايزي الشريرة, بحاول أكون أقسي وأوسخ, وحتي لو ببان كده, بلاقيني ف الآخر إنسان غلبان جداً مايقدرش يأذي حشرة, عشان أنا ضعيف, في أسوأ حالاتي إضطراباً..
 ننهي الحكاية؟ 

ننهيها خالص ونمشي من هنا, هنكون في مكان أوسخ أنا راضي

مش هفتقد حد ولا حد هيفتقدني, هرجع عدم كما كنت أو هتعذب من إله قوي, معرفش ايه اللي هيحصل, عاجز عن تغيير شئ, عاجز عن الرغبة ف شئ, وحتي مش قادر أنهي الحكاية ..

في ناس كتير بتقعد ترغي عن لازم ننبسط وبلاش تعقيد والحياة حلوة, الحقيقة بحسهم معاقين عاطفياً, إي إنسان إحساسه سوي هيفهم إن الحياة مأساة بس لازم نعيشها, لأنها أحياناً بتكون مأساة لذيذة, ولأن البديل بيكون مجهول النتيجة, انك تعيش فقط لأن الموت مكلف بطبيعته المجهولة, ولأنه كدا كدا هيحصل فا بلاش الإستعجال.
الحياة بسيطة؟ 

لأ, دي بس نظرة وإيمان الأعمي إن الألوان بسيطة أو بالأحري لون واحد
نفسك في ايه؟ 

مانفسيش, عايز بس الحياة ترجع طبيعية تاني بمشاكلها اللي كنت اتعودت عليها ومش عايز حد بحبه يتأذي, ومش عايز أي حاجة لنفسي
مبسوط؟ 

لأ, انت عايش زي أي بيكتيريا أو كائن وحيد الخلايا, وعيك شبه ضامر فامنعدكش فضيلة الإحساس
بتصلي؟ 

آه بصلّي„, بس مش عارف لمين.